Á markaðnum fékkst allt milli himins og jarðar. -Við sáum konu velja sér lifandi hænu sem að var snarlega tekin og snúin úr hálsliðnum. Þetta virtust grófar aðfarir, en sjálfsagt fátt sem að tryggir betur ferskleika! Sölumaðurinn á myndinni seldi ekkert nema ólífur af öllum stærðum og gerðum. Við heimsóttum ullarvinnslu þar sem að menn unnu við að hreinsa gærur með ævafornum aðferðum. Stækjan á staðnum var megn enda enn notað hland til þess að hreinsa ullina.

Þeir sem að selja vörur sínar á götum Tetouan koma margir hverjir ríðandi á ösnum frá nálægum fjallaþorpum. Þetta er asna "bílastæðið" Þarna standa dýrin allan daginn, en sem betur fer fyrir eigendurna eru engir stöðumælar..

Anna reynir nýtt hálsskraut - lifandi snáka!!! Malcolm komst jafnvel í enn nánari snertingu við þessi dýr. Slöngutemjarinn sendi snákana í könnunarleiðangur niður hálsmálið á skyrtunni hans og gerði sig síðan líklegan til þess að senda þá áfram niður í buxurnar, en Malcolm tókst að stöðva hann í tæka tíð. Takið sérstaklega eftir slöngutemjaranum! Við höfum ekki séð marga menn sem að okkur finnst dularfyllri í útliti heldur en þessi.