Betra veður gerði okkur kleift að huga að ýmsum verkefnum. Kaðalstigi er t.d. bráðnauðsynlegur til þess að komast um borð ef að maður fær sér léttan sundsprett eða dettur í sjóinn (aftur...)

Dvölin í Rota byrjaði ekki vel því að þegar við vorum að taka til í bátnum varð Malcolm fyrir því óhappi að kaðalendi slóst framan í hann og sendi gleraugun hans í tignarlegum boga út fyrir bryggjukantinn og í sjóinn þar sem að þau sukku til botns. Hann átti þó sem betur fer önnur gleraugu til vara.

Í mörgum bæjum og borgum hefur verið plantað pálmum og appelsínutrjám vegfarendum til ánægju og yndisauka. Litríkar appelsínurnar lífga svo sannarlega upp á umhverfið og við komumst að því (með því að prófa) afhverju þær voru látnar í friði. Ávextir þessa afbrigðis eru súrir með eindæmum og ekki ætlaðir til átu..

Maðurinn sem sést aftast á þessari mynd er yfirsmakkari hússins. Hann þarf að athuga að gæði sérrísins nái settum stöðlum og hann gengur á milli raða og smakkar á afurðunum. Hættulegt starf! Skyldi hann keyra heim?

Við fengum að sjálfsögðu að smakka líka! Þurrt, meðalsætt og sætt og í þeirri röð.